Mae’r Coleg Cymraeg Cenedlaethol yn gwahodd ceisiadau gan fyfyrwyr israddedig ar gyfer Bwrsariaeth Goffa Dr Llŷr Roberts.
Mae’r fwrsariaeth ar gael i fyfyrwyr israddedig sy’n astudio trwy gyfrwng y Gymraeg mewn unrhyw bwnc er mwyn cefnogi taith sy’n gysylltiedig â’u hastudiaethau.
Sefydlwyd y fwrsariaeth llynedd er cof am Dr Llŷr Roberts un o ddarlithwyr cysylltiol cyntaf y Coleg a fu farw’n sydyn yn haf 2023 yn 45 mlwydd oed.
Roedd chwe myfyriwr wedi elwa o’r fwrsariaeth llynedd.
Teithiodd tair myfyrwraig Bydwreigiaeth o Brifysgol Bangor i Sri Lanka er mwyn cael profiad o weithio ar wardiau geni’r ysbytai mewn gwlad sy’n datblygu.
Meddai Mia Owen:
“Fy hoff ran oedd mynd o gwmpas y ward a chyflwyno fy hun i'r holl fenywod a chael sgwrs gyda nhw er mwyn cael ychydig o’u hanes.
“Roedd bod yn Sri Lanka yn brofiad bythgofiadwy ym mhob ffordd.
“Cefais gyfle i drio bwyd newydd, cwrdd â phobl newydd, a dysgu a gweld rhan o'r byd doeddwn i ddim yn meddwl y byswn i'n gweld. Felly rwy'n ddiolchgar iawn cael y cyfle i wneud hyn o fewn fy ngradd.
“Byddwn i’n sicr yn argymell i unrhyw un sydd â diddordeb i ymgeisio am yr ysgoloriaeth yma i fynd amdani.”
Enillydd arall oedd Gwernan Brooks a deithiodd i Batagonia yn ddiweddar. Mae Gwernan yn ei hail flwyddyn yn astudio Cymraeg ym Mhrifysgol Caerdydd, a theimlai fod y cyfle wedi bod yn “hynod o fuddiol” i’w hastudiaethau. Meddai:
“Roedd gweld gymaint o bobl yn ymfalchïo yn y diwylliant Cymraeg yn arbennig. Fel rhywun sy’n dod o gymuned ble mae’r Gymraeg yn cael ei siarad yn naturiol, sylweddolais fy mod i’n gallu cymryd yr iaith yn ganiataol i raddau. Roedd hi’n ddifyr iawn gweld diwylliant Cymraeg wedi ei blethu â diwylliant Archentaidd.
“Cefais brofiadau arbennig yn addysgu yn yr ysgolion cynradd lleol ac ysgol uwchradd ddwyieithog, Coleg Camwy, ble mae Cymraeg yn cael ei gynnig fel pwnc.
"Dysgais lawer o dechnegau dysgu a chaffael iaith hefyd fydd yn ddefnyddiol iawn i mi gan fy mod â diddordeb i addysgu yn y dyfodol.”
Yn ogystal, aeth Megan Broom sy’n astudio Daearyddiaeth Ffisegol ym Mhrifysgol Aberystwyth i Bergen i astudio tirffurfiau arbennig y wlad; a bydd Shayla Virgo sy’n astudio’r Gyfraith ym Mhrifysgol De Cymru, yn teithio i America mis nesa. Bydd hi’n archwilio’r system gyfreithiol a gwella ei dealltwriaeth o egwyddorion y gyfraith gyffredin yno.
Wrth siarad am yr ysgoloriaeth, meddai Dr Dafydd Trystan, Cofrestrydd y Coleg,
“Roedd Llŷr yn angerddol am yr iaith Gymraeg, am astudiaethau busnes a marchnata, am gerddoriaeth ac am deithio.
“Mae ei waddol yn glir, ac mae’n briodol ein bod yn cynnig y fwrsariaeth yma i gefnogi’r genhedlaeth nesaf o fyfyrwyr gyda’u hastudiaethau cyfrwng Cymraeg. Mae’n amlwg bod enillwyr llynedd wedi elwa yn fawr ac felly edrychwn ymlaen at dderbyn rhagor o geisiadau eleni.
“Hoffwn gymryd y cyfle hefyd i ddiolch i deulu Llŷr am eu cydweithrediad a’u cefnogaeth wrth sefydlu’r ysgoloriaeth ac i Brifysgol Bangor ble roedd Llŷr yn darlithio.
Gellir mynd i wefan y Coleg am ragor o wybodaeth.