Yn ystod fy nhridiau yn gweithio gyda’r Coleg Cymraeg Cenedlaethol yn eu prif swyddfa yng Nghaerfyrddin, cefais agoriad llygad i’r holl waith sydd yn cael ei gyflawni o fewn y sefydliad, yn ogystal â meithrin sgiliau newydd. Yn bwysicaf oll, ges i’r fraint o gyd-weithio gydag adrannau amrywiol, gan gyflawni tasgau, sydd wedi meithrin sgiliau fydd yn werthfawr iawn pan fyddaf yn ymgeisio am swydd ar ôl i mi gwblhau fy nghyfnod yn y brifysgol.
Ar hyn o bryd, rwyf yn fy nhrydedd flwyddyn yn astudio’r Gymraeg a Hanes ym Mhrifysgol Aberystwyth. Fy ngobaith ar gyfer y dyfodol ydy gweithio o fewn y sector Gymraeg yn hyrwyddo’r iaith, a hefyd hoffwn symud i Gaerdydd i gael profiad o fwrlwm y ddinas.
Teimlais fyddai derbyn profiad gwaith gyda’r Coleg Cymraeg yn rhoi blas i mi o’r sector, a rhoi syniadau i mi o ran gyrfa yn y dyfodol.
Yn ystod fy nghyfnod gyda’r Coleg, dysgais lawer am y sefydliad gan gynnwys yr amrywiaeth o Ysgoloriaethau y mae’r Coleg yn eu cynnig i bobl ifanc i’w cefnogi gyda’u hastudiaethau yn y brifysgol. Mae 9 ysgoloriaeth i gyd mewn nifer o bynciau amrywiol ar gael i fyfyrwyr sydd yn dewis astudio yn rhannol trwy gyfrwng y Gymraeg. O bersbectif myfyriwr sydd o hyd yn gwario, mae bob ceiniog ychwanegol yn mynd yn bell! Mae hyd yn oed cymhelliant ariannol i annog myfyrwyr i wneud cwrs Hyfforddi Athrawon, yn ogystal â chynllun mentora a phrofiad gwaith, ‘Dysgu’r Dyfodol’ i’w cefnogi i fentro i’r byd addysg.
Dysgais am y Dystysgrif Sgiliau Iaith hefyd, a’r manteision o’i gwblhau gan ei fod yn ffordd dda i brofi eich sgiliau dwyieithog ac yn edrych yn wych ar CV. Yn ogystal cefais fy nghyflwyno i Borth Adnoddau'r Coleg, sydd yn berffaith ar gyfer myfyrwyr sydd yn astudio drwy gyfrwng y Gymraeg, gan ei fod yn llawn adnoddau dysgu ac adolygu ar-lein. Byddaf yn bendant yn defnyddio ‘porth.ac.uk’ wrth gwblhau fy nhraethawd hir yn y Brifysgol!
Un o’r prif bethau mae’r Coleg yn gweithio tuag at ar hyn o bryd ydy sicrhau bod addysg cyfrwng Cymraeg yn y brifysgol neu’r Coleg yn gynhwysol i bawb yng Nghymru. Cefais y fraint o gael sesiwn gydag Emily Pemberton, Cydlynydd Cydraddoldeb, Amrywiaeth a Gwrth-hiliaeth y Coleg, ac yma dysgais am ei gwaith pwysig yn dylanwadu a sicrhau bod gan bob unigolyn o gymunedau sy’n cael ei thangynrychioli llais.
Er mor addysgiadol oedd fy mhrofiad gwaith, fy mhrif uchafbwynt oedd y cyfle i gyd-weithio gyda gwahanol unigolion, a rhoi fy mewnbwn (o safbwynt myfyrwraig) i wahanol brosiectau gan fy mod i’n haelod o’i chynulleidfa darged.
Dwi’n ddiolchgar iawn i’r criw yn y swyddfa yng Nghaerfyrddin am fod mor groesawgar ac am fy nghadw i’n brysur dros y tridiau diwethaf! Rwyf wedi cael nifer o brofiadau gwahanol a chyfarfodydd diddorol gyda staff o swyddfeydd y Coleg Cymraeg ar draws Cymru. Rwyf wedi cael blas o weithio mewn sefydliad proffesiynol a chyfle i ddatblygu sgiliau gwerthfawr a fydd yn addas i mi mewn swydd yn y dyfodol. Rwyf yn gadael fy nghyfnod profiad gwaith gyda dealltwriaeth werthfawr o waith y Coleg Cymraeg, ac wedi cael y fraint o gyfarfod â nifer o unigolion newydd. Nes i wir fwynhau fy nghyfnod gyda’r Coleg, a dwi’n gobeithio gallu cadw mewn cyswllt a dod yn ôl yn y dyfodol!